【七筆思議】 鄒四的夢幻之旅：人若然忘記了愛 - 鄒凱光

　鄒四的夢幻之旅：人若然忘記了愛 - 鄒凱光

其實早於上世紀就認識鄭中基，當時他剛由美國LA回港，長頭髮的他，外表冷酷，有一道典型有錢仔的氣場，普通人如我絕非立刻就可以接受，直至後來聽到他唱歌，我被他的歌聲懾住，情不自禁說了聲「抵你寸嘅！」


其實我已經忘記鄭中基點解會唱唱吓歌，然後轉去做演員，大抵應該都係同佢性格有關，那些年自從佢出事之後，基本上鄭中基於我心裏的形象，就是徹頭徹尾的敗家仔，所以當時我認為佢敗晒份身家，就自然會消失！但後來佢因為拍《行運超人》的爆笑演出，而得到了《龍咁威》，把鄭中基式的搞笑風格定了位！但當時我每一次見到佢，都好想同佢講「其實你唱歌時最型！」但我見到佢當時的一舉一動， 心知「講嚟做乜吖！」從前有型有格的鄭中基，已經遠他而去！直至04年的一個晚上，是我上一部電影《身驕肉貴》的首映後，被邀請出席的鄭中基看完電影後，毫不留情地跟我說「好×悶喎！」那一刻我當然難堪，但我對鄭中基反而改觀，心裏不禁說了聲「其實你咁咪幾型！」然後我竟然在那刻跟他說「其實你唱歌時好型！」鄭中基當時不懂反應，我還記得在旁的杜汶澤英勇地替我解圍「我覺得佢唱歌好悶喎！所以悶定精采，其實係各花入各眼！」但鄭中基依然一點反應也沒有，又繼續同旁邊的人喝酒！就是因為這一幕，我知我同鄭中基的緣份還未真正開始！

做自己最型

開拍《金雞sss》的最初，其實只預算鄭中基會演野人一角，但由於戲份太少，最後我多想了另一個角色給他，一個有精神分裂、一直以為自己是某大明星的男妓，其實角色超好笑，但由於最後一幕，鄭中基要化身成那位大明星，而大明星卻沒有期，又沒有另一位大明星更適合這個玩法，我其實已經打定輸數，以為鄭中基做男妓這一場戲應該會取消！但監製吳君如堅持鄭中基做鴨一定有效果，要我保留這個角色，再想出另一場戲來，但由於當時一直在趕戲，我根本無時間、精力再去構思一場全新的場口給鄭中基，終於一拖再拖，拖至如果再唔拍，鄭中基就無期，君如軟硬兼施逼我交貨，就在我心煩氣躁的一刻，不滿情緒令我不停反問自己「鄭中基還有甚麼可以好笑？」而我的答案是「其實點解一定佢搞笑？點解唔可以做番佢最初，他最有型就是他唱歌的時候……」未幾我就不停在哼「人若然忘記了愛……」而手就不停地把這一場，我認為是我同鄭中基緣份正式開始的重頭戲寫好！


拍攝當日，我未見過鄭中基如此集中及凝聚，拍攝前我告訴他「你之前演得有咁行得咁行，我就係要觀眾覺得你『又係呢啲呀？！』然後到最尾，就會對你另眼相看，會覺得你好型！」佢微微點點頭，似明非明走開，但當我拍攝他背鏡唱「人若然忘記了愛……」的鏡頭時，我的眼淚奪眶而出，那份激動是來自對自己的肯定，「都話你咁咪型囉！」有時當你努力改進，但依然徒勞無功，不如停止改變自己，你會發現原來最開初的你，其實已經相當不錯！仲好型㖭！