網事力場：三哥吻賀靚女畢業

苗僑偉（三哥）最近喜事重重，繼日前有報道話佢喺加拿大讀書嘅囝囝苗俊，同一個黑皮膚嘅外籍同學Oona Oo拍拖之後，三哥嘅乖女苗彤眨吓眼又話喺加拿大嘅UBC大學畢業喇！噚日三哥喺微博貼咗阿女戴四方帽嘅畢業相，佢仲留言話：「感動時刻！」Chok爆嘅三哥同三嫂戚美珍，仲有苗俊着得好有型咁出席，見佢哋一家人個個笑到見牙唔見眼，又好肉緊咁又攬又錫影大合照，真係溫馨滿載！

網民力讚叻女

講到苗彤同苗俊呢對姊弟，深得父母嘅優良遺傳，尤其係囡囡苗彤，個樣生得標致之餘，身材亦相當高䠷，似足媽咪天生美人胚子！難怪啲相一撒網，就有唔少網民留言，激讚苗彤又靚又叻女，仲有人讚佢哋係好幸福嘅一家，唔知呢對姊弟又有冇興趣入行呢？


場主：守庫