網事力場：大文豪垃圾潮文

舊年喺屋企打爛隻玻璃杯，靚仔歌手周柏豪喺facebook發表一段200字短文，話佢用咗15分鐘去欣賞水杯美態，從此，香港樂壇一代「大文豪」正式誕生！近排大文豪忙住拍電影或者打波，少咗發表佳作，終於，大家等到喇！今次柏豪進階咗唔只識得欣賞爛玻璃，對住垃圾山都能夠有所頓悟，佩服佩服！喺泰國拍緊電影嘅佢，近日喺當地嘅垃圾堆填區幫電影埋尾，連日嚟喺微博都鋪相講吓感受，例如「在大雨過後的那種氣味，我不懂用文字來形容，我不後悔，因為這就是我一直夢寐以求的機會。」直至噚日，佢嘅感受到咗最深層次：「我終於戰勝了恐懼，戰勝了這個地方，還有就是自己，站在這裏我感到世界的大，躺在垃圾堆上，也發現自己的渺小，再見。」

能夠瀟灑同堆填區講句「再見」，又有幾多人？不過柏豪亦太過感性喇，要聞大雨過後嘅垃圾味，唔使夢寐以求嘅，揀落完雨入嚟將軍澳工業邨就聞到㗎喇！大家仲可以嘗試學習柏豪去體會嗰陣垃圾味，睇吓發唔發現到自己，心情可能會好舒暢㗎。


場主：守庫