網事力場：Sammi瞓地V唔起

鄭秀文（Sammi）嫁咗畀許志安，大家唔好再叫佢「四萬」，要改口叫「十嫂」，皆因安仔家中排第十，Sammi話好鍾意呢個稱呼。

承諾生仔
十嫂婚後未正式露面，但微博就不停有佢新動向，先係Sammi御用化妝師Zing放咗張Sammi《朝聖》MV造型相，見佢化咗個搶眼3D眼妝配超低V衫，Sammi着住件開胸衫，中門大開，之後有人回覆，話係十兄（安仔）託佢留言，嗌阿Zing專心化妝，唔好掛住望個deep V。噚日Sammi繼續晒iPad身材，曲膝瞓地由頭影落腳，角度好刁鑽，佢話一早做完運動搞到身水身汗：「氣很冷，唯一令自己會發熱的方式就是動動動！不管HIIT cardio or 八公里，都要盡力，戰勝自己，永不停步！流汗必須靠自己。流汗是原始的快樂！」

噚日就有報道爆安仔先後同Sammi求咗七次婚，最後喺Sammi生日當天推出大蛋糕，配齊鮮花、巨型鑽石同跪地三招，先奪得美人歸，Sammi仲應承會生仔，搞到兩個一齊喊。


場主：守庫