超儀帶頭出錢　梅姐銅像豎星光大道

前晚「梅艷芳——十年．安歌慈善Band Show」在九展舉行，何超儀AND THE UNI BOYS、樂隊Closer、 太極樂隊的雷有暉和鄧建明等擔任表演嘉賓，場外義賣梅姐的紀念品，有卡片盒、咖啡杯、CD和T恤等，所有門票收入扣除成本後，將撥捐聖雅各福群會作老人服務用途。

待康文署審批
80年代造型亮相的何超儀，在台上一口氣唱了幾首梅姐的歌，包括《壞女孩》，超儀說：「梅姐真係好好氣，我自己都準備咗好耐，排練嗰陣都體驗到，佢仲好識得擺甫士，唔似我淨係識擘大個髀。」超儀演出過後，透露歌迷會向政府申請，在尖沙嘴星光大道內豎立梅姐的銅像，她說：「呢個紀念騷我冇捐錢，只係呼籲大家，不過我會捐一筆錢幫梅姐搞一個銅像，呢次係芳心薈向政府申請，政府都冇問題，到時開幕嗰陣都會出席。」超儀不肯透露捐幾多錢，只稱銅像的成本很貴，阿梅歌迷亦會集資。事後芳心薈的代表稱仍在申請中，康文署正在審批。


吳浩康（Deep）擔任主音的樂隊Closer亦有份演出，Deep說：「我哋都練咗三個禮拜，今次演出都有壓力，怕唱得唔好會激嬲阿梅嘅粉絲，我好遺憾入行以嚟都未見阿梅，佢嘅台風好有感染力，喺樂壇只有哥哥（張國榮）可以同佢匹敵。」


採訪：張俊銘


攝影：仇志