網事力場：千嬅惡搞聖誕小丁

噚日係普世歡騰嘅聖誕節，眾星雙雙對對甜蜜慶祝，楊千嬅有老公丁子高同寶貝仔Torres陪倒數，一家三口溫馨滿瀉，丁生丁太笑到見牙唔見眼，仲惡搞囝囝扮小丑，真係羨慕死人；劉浩龍都唔輸蝕，擺咗同女友容祖兒嘅「合照」，兩個着住一金一銀情侶外套閃爆，網友都叫佢快求婚，不過劉浩龍就cut咗自己個頭，搞到鬼鬼祟祟咁唔夠大方囉！

而柯震東喺微博上載啜女相，個女人長長頭髮同彎彎嘅眼睛，似足緋聞女友蕭亞軒，原來係柯媽媽，網友都話柯媽媽同蕭亞軒「撞臉」，之後柯震東上載一條視頻，有齊柯媽媽同蕭亞軒喺入面，證明佢哋一齊共度佳節。而蔡一智同老婆飲香檳慶祝聖誕，大肚婆洪欣同老公張丹峰行商場，各有各精采。


場主：守庫