關仁隱事：「蛇霸」扮開會　酒店鬼混 - 關仁

富豪「蛇霸」同兩位姐仔「滑嘟嘟」同「海藻」打得火熱，蛇霸雖然風流，但又出晒名怕老婆，所以滾都滾得特別小心。

前後腳閃人
蛇霸雖然喺「車大灣」各自買咗個單位養住滑嘟嘟同海藻，但佢都好少喺兩位姐仔住處出入，怕俾老婆啲狗仔私家偵探跟到，所以蛇霸要同女朋友幽會，除咗會選擇喺遊艇外，仲周不時會喺尖沙嘴嘅「皇宮」鬼混，而且蛇霸每次都唔會坐自己車嚟，佢會有一個跟班同佢一齊搭的士到樓下酒店落車先，然後好似扮開會咁行入酒店，再神不知鬼不覺咁由另一條通道進入皇宮，而蛇霸嘅女友就會一早先上去準備。


兩個禮拜前，關仁有朋友見到蛇霸同個跟班夜麻麻喺酒店行出嚟上的士離開，隔咗半粒鐘左右，見到滑嘟嘟一個人喺酒店行出嚟，不過佢就唔係坐的士，係有部專車送佢走人。


撰文：關仁