【七筆思議】一言棠：唔想提 - 歐錦棠

一言棠：唔想提 - 歐錦棠

揭開日曆睇一睇，今日12月27，心裏即時諗：「大劑！」，明明啱啱先過年，誰知眨眼到年底，光陰快過坐火箭，時間急如瀡滑梯！通常計劃在年頭，年尾埋單慢慢計，新聞一樣有習慣，大事回顧做主題，年年難過年年過，傳媒早已成慣例，本來我都唔例外，諗定十大做發揮，忽然傳來有人聲，佢話「兄弟唔好制！」原來係撒旦小棠，已經坐喺隔籬位，佢話一心嚟勸我，做英雄都睇時勢，既然成年冇好嘢，咁仲提嚟做乜鬼？不如暢飲尋歡去，免得快樂不回歸。聽落好似有道理，香港怨氣一大批，日日新鮮鑊鑊甘，多管閒事盞吃虧。

天使大戰魔鬼

此時身邊人聲響，佢話「兄弟唔好制！」原來係天使小棠，一身白袍夠盞鬼，佢話好心勸勉我，千祈咪聽從魔鬼，好唔好都係新聞，關乎民生關時勢，你又唔係689，何必學做縮頭龜？啱啱講完呢一句，身旁有人哎：契弟！撒旦小棠揮老拳，天使小棠用踭批，兩個攬住碌落地，睇吓邊個先瞓低。難得有人打街交，我睇住剝花生米，你話人生有幾何，見天使大戰魔鬼？


忽然心頭思緒亂，在興高采烈之際，想到正是香港人，就經歷此種情勢，事不關己勿勞心，隔岸觀火最實際，你要師奶肯上街，除非佢冇電視睇！講開電視心都淡，嗰頭話祭旗咁祭，杯葛熄機齊罷睇，誓要大婆台跪低，誰知不到半個月，My盛Lady好有計，個個都話好過癮，OL放工爭住睇，罷睇一事煙雲散，杯葛被人笑儍仔，只怪港人唔爭氣，莫怪霸權頻發威！港人確實唔愛惜，言論自由之可貴，針唔拮肉唔知痛，隻眼開時隻眼閉；事例講開一籮籮，聽落問心難無愧：H7N9冇人怕，最驚過年禁食雞；人人都呻冇屋住，惟有望政府諗計，官員用屁股諗嘢，胡亂建屋免劃規，只求數量不求質，湮沒空間之可貴，更有議員發謬論，貨櫃屋建天橋底！但求有瓦可棲身，莫理環境多擁擠，鬼叫你窮頂硬上，要威就咪戴頭盔。有本事就攞綜援，月入過萬幾好使，仲要包子女外遊，兼且另計書簿費，住夠一年可申請，唔攞嗰個正儍仔！香港真係福利好，團聚為由易審批，你交稅時佢交form，交稅養佢家爺仔！香港唔使望普選，因為太監當建制，罪魁禍首表表者，689佢「路姆西」！


凡事皆與民為敵，懶理民如鍋上蟻。


講到呢度心都實，都係老舉埋年「算×數」，黃腫腳乃不消提！

撰文：歐錦棠





除表演藝術，也酷愛文字、影像及武術，其文章往往一針見血。





本欄逢周五刊登