關仁隱事：皇后巴渣犯眾憎 - 關仁

之前拍劇因為成日狂轟劇組嘅「皇后」，搞到人人都怕鬼咗佢，皇后離開咗公仔箱之後都好似冇乜工作，關仁都覺得好正常，因為佢份人真係好難頂。


皇后成日當正自己係國際巨星，對人呼呼喝喝又冇禮貌，有同佢合作過嘅演員都睇唔過眼佢嘅惡行，仲爆佢對啲助手好唔尊重，人哋都係打份工啫，唔使吓吓受你氣嘅。皇后最鍾意就係半夜三更點人去買嘢，買完就嫌貴唔肯畀番錢人，明明叫人收工在先，點知轉個頭又鬧人哋做乜咁早收工，好似思覺失調咁，都唔知佢到底想點，真係好難服侍。


由於皇后嘅性格實在太難頂，所以唔少助手都頂佢唔順，最終劈炮唔撈，而且佢個臭名亦都傳遍千里㖭，真係想搵助手都難。


撰文：關仁