2013年10月31日星期四

馮仁昭四圍超:獎門人悶爆 觀眾大覺瞓 - 馮仁昭

馮仁昭四圍超:獎門人悶爆 觀眾大覺瞓 - 馮仁昭

曾志偉主持嘅無綫節目《超級無敵獎門人終極篇》一向笑料百出,亦係收視保證,不過前晚錄影嘅一集,唔知係咪嘉賓內容欠吸引,只得袁彩雲、胡楓(修哥)等撐場,加上遊戲環節好沉悶,所以現場有觀眾公然攤喺度瞓覺豬。其中叫做有啲趣味就係叫嘉賓擺吓甫士,修哥抵死咬手指扮鹹濕金魚佬,之後再繼續示範影水着甫士,修哥仲拉高上衣露出雪白肚腩,總算笑爆全場。

爾冬陞否認存私心

袁彩雲話下月底會同老公帶兩個半月大嘅囡囡返加拿大,早前有指佢老公位於加拿大嘅兩間食店欠租570萬港元,佢話:「報道係寫多咗,我哋喺一個商場有兩間食店,但老公同合作夥伴發覺商場唔適合做,想搬出去,點知當中有啲為難,大家又溝通唔夠。」佢承認錢銀方面應該仍未搞掂,覺得有人想搞大件事。


至於早前辭去演藝人協會會長一職嘅志偉,被問林家棟同岑建勳亦相繼辭去演協職位時,佢就避忌話:「冇回應,唔答。」即趕入廠錄影。


另外,身在橫店嘅導演會會長爾冬陞噚日接受電話訪問,被問到有周刊話佢撐發牌係出於私心,搞到同志偉不和,佢解釋話:「二哥姜大衛同王維基打工,開會時已申報,如果我做事有私心點會做到四屆(導演會)會長。」爾冬陞話收到志偉退出導演會通知,但否認同佢決裂,佢笑笑口話:「決裂?我冇事喎,你問番佢同我有冇事。街外人信唔信我冇所謂,導演會會員信我最重要。」


撰文:馮仁昭

沒有留言:

發佈留言