電視撈飯：亞生鬼樣拉票　17號李大衛攝位擋14號余健深

亞視18位候選亞洲先生前晚以萬聖節造型拉隊到銅鑼灣鬧市拉票，其實去年亞視已經搵咗一班亞姐同亞生去中環蘭桂坊搞拉票，今年又趁萬聖節搞活動，真係冇乜新意，所以現場反應一般。


喺現場3號黃威文同5號吳允瀚表現最投入，周圍扮鬼臉，12號李健就四圍去嚇小朋友，啲小朋友都俾佢嚇到喊。來自馬來西亞嘅14號余健深最受歡迎，街上菲傭、印傭、自由行都搵佢合照，不過香港代表17號李大衛就鍾意周圍攝位博上鏡，前晚李大衛又攝位阻住余健深，搞到余健深都忍唔住開聲話：「你又遮住我！」

5號吳允瀚內褲遊街
亞視藝人買少見少，問到黃威文會否擔心前景？佢話：「我由細到大都睇無綫同亞視，如果冇信心就唔會參加，有危必有機，亞視我識朱慧珊、蔡國威、古卓文。𠵱家多兩個牌，亞視發射頻道都佔一半，所以都算有優勢。」吳允瀚表現自信，仲話自己非常開放，至於會唔會着三角褲遊街拉票，佢搞笑話：「如果突然說就好擔心，會處理一下，要脫很多毛，不好看的地方都要拿掉，內褲我可以接受，丁字褲就不可以。」


版主：陳基征