馮仁昭四圍超：　周永恒寸樂易玲「佢好小器」 - 馮仁昭

現年29歲嘅周永恒一向是非多多，早年同無綫正視音樂嘅音樂總監鄧智偉交惡，近日鄧智偉離職，前晚周永恒到尖沙嘴出席首映時，佢話知道鄧智偉離職，但就話唔關佢事，傳聞鄧智偉失勢敗走TVB，令人覺得好黑暗，周永恒話TVB人多自然是非多。

拒食回頭草
對於TVB提供「愛回家」熱線，問到周永恒會否食回頭草？佢話：「我都係好馬，好馬不吃回頭草，TVB易咗主咩？唔係樂小姐唔喺度呀，余詠珊要贏佢就要加油呀。」之後佢就一輪嘴寸爆樂易玲，話樂小姐問候佢家人，更指樂小姐唔OK自己，暗示樂小姐曾向其他高層提及過自己，不過周永恒就強調唔係篤背脊，而係樂小姐刻意介紹同關注佢，仲話：「我想佢原諒我，不過佢好小器，如果我自己有乜錯嘅話，我可以公開講對唔住，最緊要佢原諒我。」

問到周永恒係咪做過乜嘢得罪樂小姐？佢就話曾經講過喺TVB苦況，用TVBuddy當車馬費，總之佢覺得一場弟兄姊妹，好想同對方和好。


此外，同場嘅陳家樂明年4月同港視約滿，𠵱家工作要暫停，佢話：「有啲唔開心，希望件事快啲搞掂，有節目再搵我。」


撰文：馮仁昭